Freiburger historische Bestände - digital

Item Schultheis unnd gemein zu Friesenheim unnd Heilgenzell.

Item Schultheis unnd gemein zu Ottenheim.

Item Schultheis unnd gemein zu Oberschopfen und Dursperg.

Item Schultheis, rhat und gemein zu Lar.

Item Schultheis und gemein zu Burckheim.

Item Schultheis unnd gemein zu Dunlingen.

Item Schultheis und gmein zu Mueterßheim.

Item Schultheis und gmein zu Hugswir.

Item Schultheis unnd gmein zu Kurzell unnd Schutterzell.

Item Schultheis unnd gemein zu Ychenheim unnd Dundenheim.

Item Schultheis unnd gemein zu Altheim.

Item Schultheis unnd gemein zu Oberwiler.

Item war sein, das vor articulierte gemeinden mitt bedachtem gemutt hauffen,
eigen fenlin, houptlut, usschutz, weibel, beutmeister unnd ander empter zu dem
krieg notturfftig gemacht unnd gesetzt haben.

Item war sin, das vorgemelter gemeinden verhauffung, rottungen, handlungen
und furnemen uffruerisch, frevenlich, eigengewaltig und thätlich gewesen sey.

Item war sein, das die uffruerischen und die obarticulierten gemeinden den geistlichen
das ir mitt gwalt haben nemen wollen, ouch gewaltigklich gnomen haben.

Item war sin, das under andern gotzhusern ein apty genant Schuttern in der
Mortnaw ein mil wegs von Offennburg, dry milen von Straßburg unnd ein halb
mil von Lar gelegen sey.

Item war sein, das sein parthey gemeltz gotzhaus Schuttern apt sey.

Item war sein, das gemelt closter unnd gotzhaus von keysern unnd khöngen mitt
gutern, fryheiten und begnadungen reichlich begabt sey.

Item war sein, das vilgemelt closter mitt fenster, ysenofen und allem anderm, das
zu einem erpawten closter gehört, erpawen gewesen sey.

Item war sein, das gemelt closter ein grosser stand geprucht, underhaltung und
gastung altzitt gehept hab.

Item war sein, das gemelt closter in einem wesenlichen gepruch ordinarie und gemeinlich
an convent unnd gesind achtzig personen ongevarlich gehapt hab.

Item war sein, das gemelt closter inn dem howat, ernd, embdt, herbst unnd sonst
zu des closters reb unnd ander buw zu ziten sechtzig, zu ziten hundert mehr unnd
minder tagloner haben muß.

Item war sin, das fursten, herren, edellut und ander jars zum dickermal in grosser
anzal in gemelt closter in kheren unnd dorin erlich, wol unnd gasts wyß gehalten
werden.

Item das gemelt closter stetz Schmitten, schlossery, ein mul, ouch andere hant-
werck als schnider, pister, schuochmacher gehapt het.

204